Тілдік пәндер сабақтарында мәтіндерді пайдалану
Тілдік пәндер сабақтарында мәтіндерді пайдалануда мәтінмен дұрыс жұмыс жүргізе білу – басты мақсатты көздейді. Мәтінмен жұмыс жүргізу – тіл үйретудегі негізгі және басты бағыттардың бірі деп санаймын. Өйткені оқушы мәтін бойынша тақырып негізінде білімін толықтырады. Мәтін негізінде монолог қалыптастады, мәтін мазмұны негізінде диалогты жүзеге асыра біледі. Ал монолог пен диалог-тілді үйретудегі коммуникативтік құзыреттіліктің басты элементтері.
Жалпы менің тәжірибемде мәтінмен жұмыс барысы келесі кезеңдерді қамтиды. Мәтінмен таныс болғанға дейінгі жұмыс ( сөздікпен жұмыс ) Мәтінмен тікелей танысу жұмысы ( оқу, талдау, сұрақтарға жауап беру) Мәтінмен таныс болғаннан кейінгі жұмыс ( мәтін мазмұны бойынша тапсырмаларды орындау ). Бірінші кезеңде сөздікпен жұмыс жүргізу, сөз тіркесін, сөйлемдер құра отырып, жаңа сөздерді барынша есте сақтауға тырысу, сурет бойынша жаңа сөздерді табу тәрізді жұмыс түрлері жүргізіледі. Екінші кезеңде мәтін оқу арқылы оқушылардың тілдік норманы сақтау, орфоэпиялық нормаларды басты назарда ұстау, мәтін мазмұнын түсінуге тырысуға бағыттау жұмыстары жүзеге асырылады. Мәтінмен таныс болғаннан кейін алған түсініктерін бекіту, есте сақтау, монолог пен диалог дағдысын дамыту үшін алуан түрлі тапсырмаларды қолдануға болады. Әрине, тапсырмалардың қарапайымдылығы мен күрделілігі оқу сатысына, оқушының жас ерекшелігіне байланысты. Сонымен бірге тапсырма мазмұны мұғалімнің қандай мақсатты көздеуіне де тікелей байланысты болады.
