Дьоһуннааҕы кэпсэтии 15.04.2024 с.
Муус устар 22 күнэ – Аан дойдуга Сир күнэ. Бу күн киһи-аймах тулалыыр эйгэтигэр, сиригэр-уотугар болҕомто ууруохтааҕын тоһоҕолуур күн буолар.
Айылҕаҕа харыстабыллаах сыһыаннаах буоллахпытына, тулалыыр эйгэбит чөл туруктаах буоллаҕына, биһиги чэгиэн доруобуйалаах, үүнэр-сайдар кыахтаах дьоллоох дьон буолабыт.
Аан дойду үрдүнэн Сир күнүгэр араас тэрээһиннэр, аахсыйалар ыытыллаллар. Ол курдук, субуотунньуктар ыытыллаллар, сибэккилэри, мастары олордоллор, бөҕү-саҕы хомуйаллар.
Олох сайдан истэҕин аайы, киһи күннээҕи олоҕун чэпчэтэр араас мал-сал айыллар. Ол эрээри бу мал-сал үтүө өрүтүн сэргэ, айылҕаҕа хоромньуну, тулалыыр эйгэҕэ буортуну эмиэ аҕалар.
Биир тирээн турар кыһалҕабыт – пластик иһит-хомуос, пакет олус элбээтэ. Бу түргэнник сүтэн-симэлийэн хаалбат, сүүһүнэн сылларга сытан, айылҕаҕа, кыылга-сүөлгэ улахан кутталы аҕалар матырыйаал.
Билигин эко шоппердары, таҥас бахилалары, элбэхтэ туттуллар уу иһэр бытыылкалары, өйүө, ыһык уктар иһиттэри (ланч-бокстары) туттар хайҕаллаах уонна муодунай да хайысха буолла.
Таҥаска-сапка эмиэ өйдөөн-төйдөөн хаачыстыбалааҕы, бэйэ-бэйэтигэр дьүөрэлэһэр капсулалары талан атыылаһыҥ диэн стилистэр сүбэлииллэр.
Б өҕү-саҕы мээнэ бырахпакка, ууну, уоту (электричествоны) харыстаан туттан, оскуолаҕытыгар, олорор сиргитигэр ыытыллар субуотунньуктарга кыттан, бөҕү наардаан туттаран, бэйэҕит кылааккытын күннэтэ киллэриэххитин сөп.
Күннээҕи олохпутугар пластигы син биир туттабыт. Ыраах барарга, тыаҕа тахсарга ас, уу куттарга табыгастаах. Ол эрээри биирдэ туттан баран быраҕыллар пластик иһити буолбакка, элбэхтэ туттуллар уонна сөптөөх пластигы талар буолуҥ.
