Дьоһуннааҕы кэпсэтии. Муус устар 29 күнэ.
Сахам сирэ дьоллоох тускуга Саһарҕалыы ыҥыра ыллыыр. Илинтэн арҕаа ол кустуга Алмаас таас курдук сандаара сырдыыр. Припев : Барҕа быйаҥнаах Сахам дойдута Модун Россия киэн туттуута, Өркөн өрөгөй тойугун туойдун, Үүнэр үйэҕэ үрдүү туруохтун ! Үллэр үөстээх Өлүөнэ Эбэ Өлбөт мэҥэ угуттуур уулаах. Элбэх омукка эрчим эбэр, Или-эйэни олохтуур уохтаах. Припев Ааспыт кэммит айхаллаах суола Арчылыыр аар алгыһын биэрдэ. Сахабыт сирэ дьоһун, дуолан Сайдыы аартыгар түөрэҕэ түстэ.
Саха сирин гимнын тылларын саха биллэр поэттара Савва Тарасов уонна Михаил Тимофеев суруйбуттара. Музыкатын Кирилл Герасимов оҥорбута. Гимны 2004 сыллаахха от ыйын 15 күнүгэр бигэргэппиттэрэ. Бу сыл муус устар 27 күнүгэр Өрөспүүбүлүкэ күнүгэр аан маҥнай ылламмыта. Былааҕы уонна гербэни сэргэ гимн Саха Өрөспүүбүлүкэтин официальнай бэлиэтэ (символа) буолар. Гимны улахан суолталаах тэрээһин саҕаланыытыгар атахтарыгар туран истэллэр.
Саха народнай поэта Савва Иванович Тарасов 1934 сыллаахха муус устар 25 күнүгэр Солоҕон нэһилиэгэр Чычаас учаастагар Оллоону диэн кыракый алааска төрдүс оҕонон күн сирин көрбүт. Поэт бастакы хоһооно «Улуу Сталины үөрдүөм» диэн ааттанан 1949 сыллаахха, сэттис кылааска үөрэнэ сырыттаҕына, «Үлэ күүһэ» хаһыакка бэчээттэнэн тахсыбыт.
Савва Иванович Тарасов хаһыакка үлэтин эмиэ оскуолаҕа үөрэнэ сылдьан, 1953 сылтан Горнай оройуонун «Үлэ күүһэ» хаһыаттан саҕалаабыт. Онтон «Эдэр коммунист» хаһыат редакторынан, «Хотугу сулус» сурунаал редакторын солбуйааччытынан, «Кыым» хаһыат култуураҕа салаатын сэбиэдиссэйинэн, Саха сирин суруйааччыларын Союһун бырабылыанньатын сэкиритээринэн талыллан үгүс өрүттээх үлэни ыыппыт.
1961 сыллаахха «Таптыыр сахам тылынан» диэн бастакы кинигэтэ бэчээттэнэн тахсыбыт. Бу кинигэтин поэт ийэлээх аҕатын сырдык кэриэстэригэр анаабыт. Ону сэргэ Савва Иванович Тарасов араас омуктар айымньыларын сахалыы саҥардыбыта.
2011 сыл алтынньы 21 күнүгэр Горнай улууһун баһылыга Петр Николаевич Алексеев ыйааҕынан, улуус мунньаҕын быһаарыытынан Өрт орто оскуолатыгар Савва Иванович Тарасов аата иҥэриллибитэ.
1. Саха норуотун поэта Савва Тарасов хас сылаахха төрөөбүтэй ? а) 1934 с. б) 1944 с. в) 1945 с.
2. Бастакы айымньыта ха һыс кылааска үөрэнэ сырыттаҕына бэчээттэммитэй ? а) 6 кылааска б) 7 кылааска в) 8 кылааска
3. Савва Тарасов «Таптыыр сахам тылынан» диэн бастакы кинигэтэ хас сыллаахха тахсыбытай ? а) 1957 с. б) 1961 с. в) 1965 с.
4. Өрт орто оскуолатыгар Савва Иванович Тарасов аата хас сыллаахха иҥэриллибитэй ? а) 2004 с. б) 2009 с. в) 2011 с.
5. Саха Өрөспүүбүлүкэтин гимнын кимниин суруйбутай ? а) Софрон Даниловтыын б) Д.К. Сивцев-Суорун Омоллооннуун в) Михаил Тимофеевтыын
